Fri, 28 Feb 2020

Cebuano News: P500 Premyo Bonds sa BTr mahimong modaug yuta, balay

Philippine Information Agency
09 Dec 2019, 22:38 GMT+10

PAMUHUNAN NGA DINAGKO APAN GINAGMAY. Alang sa mga mamuhunan sa Premyo Bonds, ang tanyag, matud ni BTr Information Officer Chloe Redeja, segurado kay kini sukip na sa obligasyon sa Republika sa Pilipinas, ug may labing dako og interest. (rahc/PIA-7/Bohol)

TAGBILARAN CITY, Bohol, Dec. 5 (PIA) -- Hangtud unsa'y imong makuha sa imong P500?

Usa ka bulsita nga groceries, pipila ka tasa nga kape, o condo unit o house and lot, matud pa ni Hermilina Bulasa, hepe sa Bureau of Treasury (BTr) sa Bohol.

Kini usab samtang ang Republika sa Pilipinas pinaagi sa BTr nagatanyag sa talagsaon nga Premyo Bonds: usa ka tuig nga bonds alang sa 2020, nga seguradong daug ka na nga daan, ilabi na kon ikaw palaran.

Sa labing gamay nga pamuhunan sa P500 ngadto na sa P10 milyones aron makaapil sa papremyo, may usa ngadto sa 20 mil ka e-raffle entries ka na, samtang kining pamuhunan mo-anak pa sa tubo nga 3.00 matag tuig, padayag ni Bulasa didto sa Kapihan sa PIA.

Sa pamuhunan diin ang mga bangko mitanyag lamang og labing dako nga 1.2 porsyento ngadto sa wala pay .05 porsyento nga tinuig nga tubo, ang 3 porsyento sa BTr, mahimong mao nay labing dako.

Dugang niya, ang Premyo Bonds nahalakip sa mga programa sa nasudnong kagamhanan aron himoong nga ang government securities masuwayan usab sa mga ginagmay nga mamumuhunan.

Alang sa mga mamuhunan, ang tanyag, dugang sa information officer sa BTR nga si Chloe Redeja, sa segurado kay kini sukip na sa obligasyon sa Republika sa Pilipinas

Gawas nga taas na og kita-on sa 3 porsyento nga tubo sa usa ka tuig, makuha sa labing barato nga P500 ang matag bond, may kahigayunan ka pa nga modaug og usa ka milyon sa matag kwarter sugod Enero 2020, puno ni Bulasa.

Gawas sa cash reward nga mahimo nga dag-on, aduna usab non-cash rewards nga mahimong dag-on sa usa ka mamumuhunan: propiedad real sama sa condo unit o yuta og balay nga ihatag sa mga institusyon nga misalmot.

Ug sahi sa savings deposit ilabi na sa Automated Teller Machine Account, ang Premyo Bonds sama sa time deposit nga dili mahimo kuhaan, sulod sa usa ka tuig.

Nganong mas nindot kini?

Kay kon anaa sa ATM, nga sayun rang kuhaan, dili lisud ang pagkuha sa puhunan, ug dili na madisiplina ang kaugalingon sa pagdumala sa kwarta kay magsalig na man hinuon nga nay makuha dayun.

Lakip kini sa tumong sa Premyo Bonds, matud pa ni Bulasa, nga madisiplina ug makat-on ang tawo sa financial literacy.

Unsaon man pag-apil niini?

Kadtong gusto nga mamuhunan sa Premyo Bonds mo-adto lamang sa mga ahente nga bangko sa kagamhanan nga namaligya sa Premyo Bonds, magbukas og peso account o magtumbok sa peso account diin kuhaon ang pamuhunan, ug mo-fill-up sa kinahanglang mga dokumentos.

Kining pamuhunan irehistro dayun sa National Registry of Scriptless Securities nga masayran usab sa mamumuihunan pinaagi sa confirmation of sale.

Human kini mabayran ug makompirmar sa nasudnong kagamhanan, nan, pahiluna ug sugdi na og ihap ang imong maginansya sa imong puhunan nga makuha , human sa usa ka tuig.

Hinuon, ang pagtanyag sa Premyo Bonds, gikan lamang sa Nobyembre 25 ngadto sa Disyembre 13. (rahc/PIA-7/Bohol)

More California News

Access More

Sign up for California State News

a daily newsletter full of things to discuss over drinks.and the great thing is that it's on the house!